Тюбинская сельская модельная библиотека

Былырыыҥҥы үөрэх дьылыттан, чуолаан сэтинньи ыйтан саҕалаан оскуола оҕолоругар уонна учууталларыгар анаан төрөппүт комитета көҕүлээһининэн “Аан күн” тэрээһин олус умсугутуулаахтык ыытыллар буолла. Аата да этэрин курдук ый маҥнайгы күнүгэр буолар. Манна хас биирдии оҕо, кылаас салайааччыта, учуутал, тэрийээччи бары сахалыы таҥастаах, олбохтоох кэлэллэр. Ый туһунан иһитиннэрии, ый алгыһа, түс киһитэ, быраабылата, сиэрэ-майгыта, аһа барыта оҥоһуллар уонна кэпсэниллэр. Ый туһунан, ый бэлиэтин саха тылын учуутала Туйаара Алексеевна Соловьева, ый алгыһын Намыйа Хотун- Ольга Семеновна Куприянова, түс киһи туһунан олохтоох модельнай библиотека сэбиэдиссэйэ Полина Алексеевна Шестакова, быраабыла, сиэр-майгы туһунан социальнай педагог Мария Николаевна Чепалова, ый аһын туһунан төрөппүт кэмитиэтин бэрэссэдээтэлэ Туяра Васильевна Попова иһитиннэрэллэр. Ый сиэрин-туомун хас биирдии оҕо кутугар чугаһатан истэн, ылынан, түмүгэр төрөппүттэр астаабыт минньигэс астарын амсайан, үөрэн-көтөн тарҕаһара үтүө холобурга кубулуйда. Оскуола оҕотун төрөппүтэ барыта кыттыһар, ыйдарынан арахсан ас астыыр, бары олус эппиэтинэстээхтик сыһыаннаһаллар. Аан күммүт быйылгы үөрэх дьылыгар Балаҕан ыйыттан саҕаланна. Бу тэрээһин оҕону сахалыы иитиигэ, ис кутун уһугуннарыыга туһаайыллар. Былырыыҥҥыга тэҥнээтэххэ оҕолор уоскуйбут, болҕомтолоохтук истэр буолбуттар. Балаҕан ыйыгар үөрэххэ ситииһиилээх буолар алгыс оҥоһуллубута, алтынньыга бас-көс дьоннорго, салайааччыларга туһаайылынна. Бу бырайыак бу курдук ый аайы эбиллэн, тэнийэн иһиэхтээх.