Тюбинская сельская модельная библиотека

Сылын аайы ыытыллар «Көлүөнэлэр көрсүһүүлэрэ» күрэс чэрчитинэн интеллектуальнай оонньууну олохтоох модельнай библиотека тэрийэн ыытар. Быйылгы 2026 сылга Саха көрдөрөр иһитиннэрэр хампаанньа каналыгар көстөр бырааһынньыктааҕы «Кини кимий?» биэрии курдук оҥорон оонньоттубут. Уопсайа 4 хамаанда: оскуола оҕолоро, устудьуоннар, орто көлүөнэ уонна аҕам саастаахтар 4-түү киһилээх хамаанда туруораннар кииристилэр. Манна күөх экраҥҥа хаартыска көстөр, тутатына таайдахтарына 100 балл, маҥнайгы чэпчэтии ыллахтарына 50 балл, иккис чэпчэтии ыллахтарына 25 балл, сатаан эппиэттээбэтэхтэринэ атын хамаандаҕа бу боппуоурос бэриллэр. Түбэ, Нам, Саха сирин, Россия, Аан дойду биллэр дьоннорун хаартыскалара көһүннүлэр. Быйылгы үбүлүөйдээх саха, нуучча суруйааччыларын хаартыскаларын эмиэ таайтардыбыт. Бу күрэскэ дьүүллүүр сүбэнэн ытыктыыр, убаастыыр киһибит Розалия Егоровна Лукина уонна «Айхал» НАДь дириэктэрэ Дария Петровна Попова 8лэлээтилэр. Түмүккэ оскуола оҕолоро — 4 м., устудьуоннар — 3 м., орто көлүөнэ — 2 м., аҕам саастаахтар — 1 м. буоллулар.

Манна даҕатан эттэххэ, көлүөнэнэн көрсүһүү бырааһынньыга Ороһооспо күн нэһилиэк олохтоохторун барыларын түмэн астык тэрээһин ыытыллар. Бу маны бастаан нэһилиэкпит маҥнайгы баһылыга Розалия Егоровна Лукина 1993 сыллаахха оскуола оҕолоро уонна устудьуоннар көрсүһүүлэрэ диэн тэрийбитэ. Ол ыарахан 90-с сылларга устудьуоннарга көмө оҥорон, сүбэ-ама биэрэн, төгүрүк остуоллаан атаараллара. 2001с. саҥа спортзал тутуллуоҕуттан оҕотуттан кырдьаҕаһыгар диэри дьиҥнээхтии көлүөнэлэр көрсүһүүлэрин тэрийэн, салгыы Константин Константинович, «Айхал» СК үлэһиттэрэ, спорт инструктор иилээн-саҕалаан күн бүгүҥҥэ диэри ыыта тураллара, традиция быһыытынан хаалан, Ороһооспоҕо ыытыллыбыта быйыл 25 сыл буолбут. Кырдьык бу күнү хас биирдии нэһилиэк олохтооҕо долгуйа, үөрэ-көтө кэтэһэр. Маннык бары бииргэ түмсүү бырааһынньыктааҕы астык настырыанньаны, чахчы да күүтүүлээх кэрэ кэми бэлэхтиир.

Быйылгы күрэххэ 4 хамаанда 7 көрүҥҥэ хаамыскаҕа, хабылыкка, дуобатка, саахыматка, волейболга, канатка, дартска күрэхтэстилэр, бары да астыннылар, дуоһуйа сынньаннылар. Уопсай түмүккэ 1 м — орто көлүөнэ, 2 м — устудьуоннар, 3 м — аҕам саастаахтар буоллулар. Аҕам саастаахтар оскуола оҕолорун, ыччатары кытта тэбис тэҥҥэ хаалсыбакка күрэхтэһэллэрэ, куруук бары көрүҥҥэ барытыгар миэстэлэһэллэрэ, барыбытыгар үтүө холобур буолар.

Быйылгы күрэххэ долгутуулаах, үөрүүлээх түгэнинэн Түбэ нэһилиэгин саамай улахан хаһаайыстыбатын баһылыга Радик Гурьевич Лукин нэһилиэк спортсменнарыгар 12 уол, 12 кыыс единай формаларын бэлэх уунна. Радик Гурьевич кэлэр кэнчээри ыччат сайдыытыгар, нэһилиэккэ спорт күүскэ сайдарын туһугар уруккуттан күүс-көмө, бөҕө-тирэх буолар. Бу формалары Түбэ ыччаттара нэһилиэк, улуус күрэхтэһиилэригэр кэтэн элбэх ситиһиилээх буолуохтара диэн бүк эрэнэбит. Нэһилиэк бары олохтоохторуттан Радик Гурьевичка истиҥ махталбытын тиэрдэбит. Доруобуйаны, дьиэ кэргэнигэр дьолу-саргыны баҕарабыт!