Тюбинская сельская модельная библиотека

Бу үбүлүөй түөртэ көһөн, ыытыллар кэмэ дьэ кэлэн, ахсынньы 17 күнүгэр күүтүүлээх үбүлүөйбүтүн дьэ тэрийэн ыыттыбыт. Нэһилиэкпит килбэйэр киинигэр “Айхал” норуот айымньытын дьиэтигэр үөрүүлээх чааһа кылыһахтаах куоластаах Дайаана Никифорова, Дария Попова тойуктарынан арылынна. Салгыы Түбэ нэһилиэгин Библиотекатын историятыттан видеоролик көстөн, уруккуну, ааспыты ахтан-санаан ыллыбыт, көрөн-истэн  аастыбыт. Эдэр, талааннаах үҥкүүһүт, худрук кыыспыт Нарияна Уодай, 10 кылаас үөрэнээччитэ Талбан Григорьев «Кинигэлээх үҥкүүлэрин» имигэс хамсаныылара чахчы да киһи кутун тутта. Мип-минньигэс кырачаан оҕолорбут, “Түбэчээнэ” уһуйаан иитиллээччилэрэ — Илья Белолюбскай, Алина Федорова, Мия Сивцева “Кинигэ” туһунан хоһоону доргуччу ааҕан хас биирдии көрөөччү сүрэҕин-быарын сылаанньыттылар. Ылбаҕай ырыалаах Анджелина Федорова, Юлия Иванова, оскуола оҕолорун “Дэгэрэҥ” үҥкүүлэрэ биэчэри өссө киэргэттилэр. Маны барытын иилээн-саҕалаан Амана Дьяконова олус истиҥник, өрө күүрүүлээхтик ыытта. Кэлбит ыалдьыттар истиҥ баҕа санаалара, эҕэрдэлэрэ библиотекабыт салгыы чэчирии сайдарын, тупсарын туһугар туһаайылынна.

Араас сылларга үлэлии-хамсыы сылдьыбыт күндү дьоммутугар Саха өрөспүүбүлүкэтин Национальнай библиотекатын, Нам улууһун муниципальнай тэриллиитин, Нам улууһун култууратын управлениетын, Н.М.Рыкунов аатынан Намнааҕы кииннэммит библиотекатын аатыттан наҕараадалар, махтал суруктар туттарылыннылар. Түбэ библиотеката үлэлии сылдьыбыт убаастабыллаах коллегаларыгар өйдөбүнньүк статуэткалары, саҥа тахсыбыт «Кэм-кэрдии кэрэһитэ, өй-санаа төрдө» диэн ахтыы-кинигэтин бэлэх уунна.

Үбүлүөйүнэн сибээстээн ыытыллыбыт «Кэлэр кэм библиотеката оҕо хараҕынан» диэн кылааһынан макет оҥоруутун күрэҕэр уопсайа 9 кылаас кыттыыны ылбыта. Манна 30 сыл эҥкилэ суох библиотека сэбиэдиссэйинэн үлэлээбит Марита Афанасьевна Сивцева анал бирииһин «Гран-при» хаһаайыннарыгар 3 кылаас үөрэнээччилэригэр (кыл. сал. А.П.Дьяконова) үөрэ-көтө туттарда. 2012-2022 сс. сэбиэдиссэйдээбит  Юлия Алексеевна Иванова  1 үрдэли ылбыт – 6 кылаас үөрэнээччилэригэр (кыл. сал. А. Н. Птицына), 2022-2024 сс. сэбиэдиссэйдээбит Людмила Савельевна Григорьева 2 үрдэли ылбыт – 8 кылаас үөрэнээччилэригэр (кыл. сал. В.Н.Григорьева), билиҥҥи сэбиэдиссэй Полина Алексеевна Шестакова 3 үрдэли ылбыт – 1 кылаас үөрэнээччилэригэр (кыл. сал. О.С.Куприянова) анал бириистэрин туттардылар.

Улууска биллэриллибит КИНИГЭ туһунан хоһоон айыытын күрэҕэр Көбөкөн, Модут, Нам, Никольскай, Салбаҥ, Түбэ, Фрунзе, Хамаҕатта, Хатыҥ-Арыы, Хатырык нэһилиэктэриттэн барыта 18 киһи кыттыыны ылла. Бииртэн биир үчүгэй хоһоон айыллан тахсыбыт. Бу барыта «Кинигэ – билии-көрүү бараммат байҕала, өй-санаа уостубат кылаата» диэнхоһоон хомуурунньуга буолан бэчээттэнэн таҕыста. 18 хоһоону «Отуу уота» литературнай түмсүү чилиэннэрэ: Зинаида Васильевна Нератова – Тупсууна, бэрэссэдээтэл, Мария Петровна Мохначевская – Марта-Мария, Аскалон Лукич Егоров – Өркөн Дьол сыаналаатылар. Дьүүллүүр сүбэҕэ кимин билбэккэ эрэ сыаналыыллара дьиҥнээх уонна сиэрдээх буолуо диэн 18 хоһоону хаартыскаларын, ааттарын ылан баран ыытыллыбыта, онон “вслепую” сыаналаабыттара. Ким да кимиэхэ да ыалдьыбат, чахчы  айыллыбыт хоһоон ис хоһоонун, тутулун, киһиэхэ хайдах киирэрин сыаналаатахтара. Хас биирдии бэйэлэрэ барытын көрөн, ааҕан, олус биһирээбиттэр. Үһүөннэрин түмүктэрэ сөп түбэспититтэн соһуйан эрэ хааллыбыт, уонна үһүөн 3 миэстэ, 5 биһирэбил хайаан да тахсыахтаах диэн санааларын эппиттэрэ. Күрэх аата күрэх, бэйэтин геройдарын ол эбэтэр чаҕылхайдарын булар.  Ол курдук, 1 үрдэл – Саргын кыыһа Күннэй (Нам), 2 үрдэл – Дария Романовна Дьяконова (Түбэ), 3 үрдэл – Саргылаана Кирилловна Нератова – Салбаҥ библиотекатын сэбидиссэйэ буоллулар. Онтон  Салбаҥтан Галина Семеновна Баишева, Хатырык оскуолатын 10 кылааһын үөрэнээччитэ Алина Григорьева, Көбөкөнтөн Аида Ивановна Егорова, Никольскайтан Екатерина Романовна Колесова, Түбэттэн Ольга Семеновна Куприянова буоланнар добун суруктарынан, хоһоон хомуурунньуктарынан наҕараадаланнылар. Биһирэбили ылбыт 5 киһиэхэ З.В.Нератова – Тупсууна «Санаам ымыылара», «Дууһам туойар тойуга» сырдык иэйиилээх хоһооннорун хомуурунньугун бэлэх уунна. Бу курдук икки улахан күрэх түмүктэрин биллэрдибит.

Ыҥыырыылаах ыалдьыттарбытын «Алгыс» балаҕан дьиэтигэр көмүлүөгү оттон, арыылаах саламаатынан, алгыстаах алаадьынан, уохтаах кымыһынан үөрэ-көтө көрүстүбүт. Сандалы маанылаах остуолун тэрийсибит, минньигэс аһынан көмөлөспүт  тэрилтэ салайааччыларыгар, олохтоох дьаһалта (Г.В.Гуляев), М.Е. Охлопкова аатынан орто оскуола (дир. Е.И. Шарина), “Түбэчээнэ” уһуйаан (сэб. А.М. Лукина), «Айхал» норуот айымньытын дьиэтин (дир. Д.П. Попова), “Намкоммунтеплоэнерго” (нач. Т.Т. Григорьев), почта (сэб. Л.Н.Дьяконова), балыыһа (сэб. Н.В.Дьяконова), ветеринария (сэб. Г.В. Филппова), быыһыыр сулууспа (нач. К.К.Федоров) коллективтарыгар, нэһилиэк наставниктарыгар (сал. О.А.Захарова), ветераннар Сэбиэттэригэр (бэр. М.П. Сивцева), балаҕан хаһаайкатыгар (А.И. Куприянова), үлэлии сылдьыбыт дьоммор  истиҥник махтанабын. Биирдиидээн көмөлөспүт Людмила Савельевнаҕа, Юлия Алексеевнаҕа, Марита Афанасьевнаҕа, Антонина Гаврильевнаҕа, Софья Гаврильевнаҕа, Наталья Иосифовнаҕа, Туяра Васильевнаҕа, Варвара Николаевнаҕа, Каролинаҕа, Матрена Васильевнаҕа, Радик Ивановичка, Александра Николаевнаҕа, Светлана Иннокентьевнаҕа, Татьяна Ивановнаҕа, Альберт Анатольевичка  көмөҕүт, өйөбүлгүт иһин уонна мип-минньигэс тортаах Марина Никандровнаҕа истиҥник махтанабын. Намнааҕы киин библиотека салайааччыларыгар, бары үлэһиттэригэр, филиалларга, информационнай отделга туспа истиҥ махталбын тиэрдэбин. Убаастабыллаах  дьүүллүүр сүбэҕэ Тупсуунаҕа, Марта-Марияҕа, Өркөн Дьолго хоһоон айыы күрэһин сөбүлэһэн сыаналаабыккытыгар, Тупсууна кинигэлэргин бэлэх ууммуккар махтал истиҥ тылларын аныыбын. “Норуот күүһэ — көмүөл күүһэ” диэн этиинэн салайтаран астык тэрээһини ыыттыбыт, дуоһуйа сынньанныбыт, бары да астынныбыт.

Полина Шестакова, Түбэ модельнай библиотекатын сэбиэдиссэйэ.