Тюбинская сельская модельная библиотека

Россияҕа норуоттар сомоҕолоһууларын, Саха сиригэр култуура сыллара биллэриллибиттэрин чэрчитинэн, бэҕэһээ Түбэ нэһилиэгэр Словакияттан, Венгрияттан төрүттээх Йозеф Тоту, Ян Крупа, Маргарита Сайолова уонна Софья Егорова кэлэн ыалдьыттаан, нэһилиэк историятын истэн, илэ харахтарынан көрөн, астынан, дуоһуйан бардылар. Бу омук дьонун биһиги нэһилиэкпитигэр Россия суруйааччыларын союһун чилиэнэ, «Полярная звезда» сурунаал солбуйааччы редактора, Намтан сыдьааннаах Ираида Гаврильевна Попова арыаллаан илдьэ кэллэ. Нэһилиэк баһылыгын солбуйааччы Юриан Денисович Федоров уонна «Отуу уота» литературнай түмсүү чилиэнэ, ырыаһыт-мелодист, поэт Аскалон Лукич Егоров- Өркөн Дьол кыраныыссаҕа ыалдьыттары алгыстаах алаадьынан уруйдаан көрүстүлэр, «Культура» учаастагар киллэрэн онно баар часовняны уонна былыргы аҕабыыт дьиэтин көрдөрөн, историятын сэгэтэн кэпсээтилэр. Салгыы «Алгыс» балаҕан дьиэтигэр көмүлүөк оһоҕу оттон сахалыы сиэринэн итии чэйдээх сандалыга ыҥыран ыалдьыттары чэйдэттибит, билистибит, көрүстүбүт.

Олохтоох модельнай библиотекаҕа нэһилиэк туһунан уопсай өйдөбүлү ылан, Түбэ суруйаачыларын кинигэлэрин, оҕолор оҥорбут макеттарын көрөн, ааҕааччылар төһө сылдьалларын, библиотека фондатын билистилэр. Кэһии гынан аҕалбыт сахалыы кинигэлэрин, сурунаалларын бэлэх ууннулар.

Биир чаҕылхай ыччаппыт Николай Попов «Туйгун кэмп» турбазатын, Дьааҥы хайатын көрөн, Өлүөнэ өрүс салгынынан тыынан сөҕөн-махтайан, дууһалыын астынан кэллилэр.

Былыргы таҥара дьиэтин — эргэ кулууп тутуутун таһыгар маалыып оҥорон көтүрэргэ көҥүл ыллылар. Кэлэр өттүгэр бу турар миэстэтигэр саҥа многофункциональнай центр тутуллуохтаах.

Онтон түөлбэ салаайааччылара, нэһилиэк актыыбнай олохтоохторо кыттыылаах оҕо иитиитин туһунан атах тэпсэн олорон кэпсэтистилэр, сахалыы ырыаны ыллаан иһитиннэрдибит, кинилэр эмиэ бэйэлэрин омуктарын тылынан ырыа ыллаан дьиэрэттилэр. Словацкай ырыаҕа сахалыы ү, ө дорҕооннор баалларын соһуйа иһиттибит.

Бу курдук норуоттар сомоҕолоһууларын сыла биһиэхэ атын омуктары кытта билсииттэн саҕаламмыта ураты өйдөбүл буолла. Илдьэ сылдьыбыт Ираида Поповаҕа, Александра Иннокентьевнаҕа, Аскалон Лукичка, Юриан Денисовичка уонна бу көрсүһүүгэ кыттыбыт бар дьоммутугар ыалдьыттарбыт истиҥник махтанан, көрсүһүүттэн астынан айаҥҥа туруннулар.